Aşıq Kamandar:
Bu dünya bir güllü bağdır,
Sən açmasan, mən açmaram.
Söz ətrini bənövşətək,
Sən saçmasan, mən saçmaram.
Zəlimxan Yaqub:
Dünya bülbüllü bir bağdır,
Sən ötməsən, mən ötmərəm.
Bu sehrdən, bu sevdadan,
Sən getməsən, mən getmərəm
Aşıq Kamandar:
Hikmət var, hikmət doludur,
Ulusdan, eldən uludur.
Getdiyimiz Haqq yoludur,
Sən çaşmasan, mən çaşmaram.
Zəlimxan Yaqub:
Biz bir eşqin butasıyıq,
Gülü gülə tutasıyıq
Bir çəməndə bitəsiyik,
Sən bitməsən, mən bitmərəm.
Aşıq Kamandar:
Bu dünya bir güllü bağdır,
Sən açmasan, mən açmaram.
Söz ətrini bənövşətək,
Sən saçmasan, mən saçmaram.
Zəlimxan Yaqub:
Qayalar var, qanan mənəm,
Qalalar var, yanan mənəm,
Səni məndə tapan mənəm,
Sən itməsən, mən itmərəm.
Aşıq Kamandar:
Od törəyər od canından,
Mərd törəyər mərd qanından.
Həqiqətin meydanından,
Sən qaçmasan, mən qaçmaram.
Zəlimxan Yaqub:
Tər çiçək ollam yazına,
Gümüş tel ollam sazına.
Zəlimxanam, murazına,
Sən yetməsən, mən yetmərəm.
Aşıq Kamandar:
Kamandaram, həvəsində,
Yurd-yuvam var nəfəsində.
Ariflərin məclisində,
Sən qoşmasan, mən qoşmaram.
Yuxarı